Title Image

L’Università di Corsica allarga a so offerta di furmazione

Per l’annu 2018-2019, l’Università di Corsica mette in ballu diplomi novi è prupone spezialisazione inde duminii varii assai. U scopu : accuncià si sempre megliu cù i bisogni di u territoriu.

 

 

A rientrata và di paghju cù e nuvità à l’Università di Corsica. In l’andatura di l’anni scorsi, per apre a via di a riescita è di l’inserimentu à i so 4700 studienti, hà messu in ballu u campus di Corti un’offerta di furmazione diversificata, cù insignamenti di prima trinca in e so facultà, scole è istituti.

Fatta fina, prupone l’Università di Corsica più di una centina di diplomi da u livellu di u bascigliè fin’à u dutturatu « cù a primura custante di l’inserimentu di i studienti, è arrimbendu si sempre di più à e furmazione chì anu un cuntenutu forte di prufeziunalisazione », spieca Vanina Pasqualini, vice-presidente di l’Università di Corsica in carica di a furmazione è di a vita universitaria.

Spartuta in gran’duminii fundamentali, l’offerta di furmazione custruita in Corti vole accuncià i prugrammi pedagogichi cù l’attese di u territoriu corsu in quantu à u sviluppu « in una logica di custruzzione è d’ascolta cù u mondu ecunomicu per sviluppà e cumpetenze in leia diretta cù i bisogni », preciseghja Vanina Pasqualini.

 

Di fatti, per l’annu 2018-2019, l’Università di Corsica hà messu in ballu novi diplomi in duminii varii assai. In u prugramma : trè nove licenze prufeziunale in giru à i mistieri di l’immubiliare, i mistieri di l’amministrazione è e cullettività territuriale è una spezialisazione in educazione è mutricità per i studienti in scenze è tecniche di l’attività fisiche è spurtive.

In u listessu tempu, al di là di a rimessa à ghjornu di parechji diplomi da risponde à l’evuluzione di u mercatu di u travagliu, prisenta a carta di furmazione di u 2018-2019 l’apertura di sei Masters novi in e facultà di lettere, di dirittu è di scenze. U scopu : accuncià si sempre megliu cù i bisogni di u territoriu. « Avemu, per un dettu, messu in ballu un Master « ingenerie per a salute » à a facultà di e scenze è techniche, in giru soprattuttu à l’aiutu à a ghjente, ditaglia Vanina Pasqualini. Currisponde à un’urientazione strategica in leia cù u mercatu di l’impiegu. Hè custituita una parte impurtante di a populazione corsa di persone in difficultà suciale, isulate, à spessu in u rurale. U scopu di stu Master hè di sviluppà cumpetenze precise da risponde à sti bisogni ».

 

 

Di u listessu ceppu, u Master « lingue, literature, civilisazione strangere è regiunale », arrimbatu à l’appiecazione di a lingua corsa à l’ingeneria di a mediazione culturale è di l’animazione, vole risponde à i bisogni chì affaccanu in u duminiu di a lingua corsa. « Sò state spresse l’attese per prumove a piazza di u corsu in i media, per un dettu, è in u settore di l’animazione culturale, spieca Vanina Pasqualini. Deve permette di risponde ci sta furmazione nova prufeziunalizendu di più a filiera di i studii in lingua corsa ».

Intantu, puru impegnata ch’ella sia in a messa in ballu di diplomi novi, ùn vole limità l’Università di Corsica a so offerta nova à sti sviluppi di furmazione. In u frattempu, travaglia per mette in ballu una « trasfurmazione pedagogica di l’insignamenti, face sapè Vanina Pasqualini. Vale à dì una leia più stretta trà e furmazione è l’intraprese. D’altronde, circa 90 % di i nostri Masters sò pruposti in alternanza da favurizà a prufeziunalisazione. Oghje, a carta sana di furmazione prupone una spezialisazione prugressiva subitu cù a licenza per via d’ozzione o di stazii chì permettenu un’urientazione più fine di i studienti longu à u so parcorsu da appruntà u so inserimentu è limità i fiaschi ».

 

Unepochi di studienti chì, à le volte, sceglienu di seguità a so furmazione al di là di e fruntiere di l’isula. Impegnata assai inde a via di l’internaziunale, incuragisce l’Università di Corsica i so studienti à sviluppà una vera cultura di a mubilità cù aiuti finanziarii incittativi. A maiò parte di e furmazione permettenu d’altronde di seguità simestri sani di studii à l’internaziunale, per via di u prugramma Erasmus soprattuttu, è di una centina d’università partinarie in u mondu sanu. « Avemu, per un dettu, sviluppatu co-diplomi cù l’Università di Sassari, in Sardegna, o cù l’Italia per via di l’Università di Pisa, preciseghja Vanina Pasqualini. Cerca, ghjustu à puntu, à accumpagnà li u nostru serviziu di e rilazione itnernaziunale per un sughjornu à u strangeru cù una squadra dedicata longu à e so dimarchje ».

Una bona per seguità una furmazione di prima trinca, puru luntanu da e fruntiere di a Corsica.

Offerta di furmazione

Offerta di furmazione di l'Università di Corsica per a rientrata 2018

READ MORE