Per via di u rinfurzamentu è di a diversificazione di e furmazione in giru à a salute, cerca di risponde l’Università di Corsica à a crescita di i bisogni nant’à u territoriu, in quantu à i curamenti.
Face parte di e grande nuvità di a rientrata di u 2025 à l’Università di Corsica : per a prima volta, accoglie u campus di Corti una prumuzione di seconda annata di studienti per u diploma di furmazione generale in scenze medicale.
Fin’à oghje, era accessibule nant’à l’isula solu a prima annata di i studii di salute. Oramai, ci ponu fà i studienti chì anu sceltu a spezialità di medicina, tuttu u so primu ciculu, fin’à a terza annata, nanzu di seguità i so studii à l’Università di Ecchisi-Marseglia, partinaria di a furmazione. « U scopu hè di allargà l’offerta di salute nant’à u nostru territoriu, spieca Jérémie Santini, u duganu di a facultà di e scenze, tecniche è salute di l’Università di Corsica. Ci deve permette u rinfurzamentu di sta filiera di fidelizà i studienti da ch’elli si stallinu nant’à l’isula dopu à i so studii. »
Di ferraghju 2025, avia datu u cunsigliu naziunale di l’insignamentu superiore è di a ricerca u so accunsentu per l’apertura di a seconda è di a terza annata di u diploma di furmazione generale in scenze medicale à l’Università di Corsica. Avia marcatu una girata u lanciamentu di sta furmazione, in u 2004. Per a prima volta, avianu a pussibilità i studienti di fà, in Corsica, una prima annata di studii di salute. U scopu : permette à i giovani Corsi di seguità sta furmazione vicinu à i so lochi è tirà à frenu a desertificazione medicale chì minaccia l’isula. Mentre i dui ultimi decennii, 510 studienti sò riesciuti à buscà si a so prima annata nant’à u campus di Corti. Nant’à i 167 chì anu ricevutu u so diploma di Statu, sò a metà à travaglià in Corsica oghje ghjornu è cuntribueghjanu à rinfurzà l’offerta di i curamenti. « Oghje ghjornu, sò 44 generalisti è 36 spezialisti venuti da sta furmazione à travaglià inde l’isula », accerta Sophie Vincenti, a direttrice di i studii di salute PASS-LAS è direttrice aghjunta di a facultà di e scenze, tecniche è salute di l’Università di Corsica. Nant’à un territoriu induv’ella hè à spessu l’isulanità un inciampu per l’accessu à i curamenti, hè tamanta l’imbusca di a furmazione di i prufeziunali di a salute.
Ogni annu, arregistreghja l’assicuranza malatia circa 18 000 spiazzamenti di Corsi nant’à u cuntinente per ragione medicale, secondu l’agenzia regiunale di a salute, nant’à 350 000 abitanti. Sò parechje e ragione : u ricorsu à l’ecchippamenti medicali di altu livellu è à certe spezialità chì ùn si trovanu in Corsica, o e mancanze in quantu à e risorze umane. Risultatu : si facenu 20 % di i curamenti fora di l’isula.
Da parà sta prublematica, porta l’Università di Corsica l’ambizione di sviluppà a so offerta di furmazione, in cullaburazione cù i prufeziunali è i stabilimenti di salute di a Corsica. Per a rientrata universitaria di u 2025, hà accoltu a prima prumuzione di u diploma d’università « neuro-reeducazione di u muvimentu », un campu disciplinariu sempre di più impurtante per via di a prupurzione di a pupulazione anziana, chì hè frà e più impurtante di Francia. Dapoi una vintina d’anni, sò stati di fatti messi in ballu una decina di diplomi in furmazione cuntinua per ch’ella sia di più diversa l’offerta inde i duminii di l’analisi medicale, di i curamenti d’infirmieri, di a pusturologia, di l’impiantazione urale, di a cicatrisazione, di u supportu trà pari o di e pratiche cognitive è cumpurtamentale. « Anu per scopu ste furmazione di anticipà i bisogni di u territoriu, arrechendu cumpetenze nove, puru per l’attori di a salute chì sò digià in attività è chì volenu sviluppà nove manere di fà inde e so pratiche, spieca Sophie Vincenti. Hè una risposta di pettu à a calata di a demugrafia medicale chì deve permette dinù di megliurà a qualità di i curamenti posti da a crescita è da l’invichjera di a nostra pupulazione. »
Ottobre di u 2025