Title Image

Eco-Campus : l’Università di Corsica s’impegna per l’ambiente

« Hè d’obligu oghje d’evuluà i nostri cumpurtamenti è di riduce u nostru impattu nant’à l’ambiu », face sapè Paul-Marie Romani, u presidente di l’Università di Corsica. Per via di i so prugetti di piattaforme di ricerca, e furmazione ch’ella prupone è i scontri in giru à e scenze è a sucetà ch’ella urganizeghja di modu regulare, hè l’Università di Corsica un attore impegnatu dapoi parechji anni à u serviziu di a priservazione di l’ambiente. Vole oghje inizià parechje azzione in giru à u patrimoniu è à a mubilità. U scopu : fà di l’Università di Corsica un’Università ecu-rispunsevule.

 

 

Dapoi parechji anni, facenu a scumessa i siti universitarii di Corti, Aiacciu, Carghjese è Biguglia di fà ecunumie d’energia per fà calà quant’è pussibule u so impattu nant’à l’ambiente. U nome di sta dimarchja eculogica : eco-campus. In fatti, ùn hè natu avà u muvimentu à favore di un campus più rispunsevule à u livellu ambientale, ma si hè stallatu propiu dapoi u 2015.

Sti pochi anni, si hè impegnata l’Università di Corsica inde un prugramma maiò di rinnuvazione energettica di i so bastimenti per riduce a so cunsumazione energettica. Bisognu à ramintà ch’ellu hè tamantu u cantieru : cù 39 bastimenti spartuti trà i siti di Corti, Aiacciu, Carghjese, Biguglia è u Borgu, raprisenta u patrimoniu di l’Università di Corsica più di 51 000 metri quadrati è prisenta una fattura energettica vicina à 800 000 eurò tutti l’anni.

 

Tocca sta missione à a direzzione di u patrimoniu, di a logistica è di a prevenzione, è ne cunnosce benissimu l’imbusche u direttore, Pierre Mattei. « Hè doppiu l’interessu, spieca Pierre Mattei. Hè per quessa chì i nostri bastimenti i più vechji si buscanu à pocu à pocu e norme nove da pudè esse di più efficaci in quantu à l’ecunumie d’energia ».

Quellu chì cunsumanu u più energia sò scritti inde u Schema direttore immubiliare è d’accunciamentu (SDIA) di l’Università di Corsica. Per avà, hà previstu a direzzione di u patrimoniu, di a logistica è di a prevenzione un inviluppu di circa 9 milioni d’eurò per mette in ballu e riabilitazione impurtante in quantu à l’isulamentu termicu è a rinnuvazione estetica toccu u 2022.

Da assicurà una gestione tecnica chì sia a più fine pussibule, hà dinù ricrutatu l’Università di Corsica un « manager energia » da persegue tutti i segni di sopra cunsumazione è da mette in ballu l’azzione necessarie per agisce.

Per dà di più pesu à sta dimarchja, in u 2018 si hè dinù impegnata l’Università di Corsica inde u cuncorsu Cube 2020. U scopu : fà calà di 10 % a fattura energettica di dui bastimenti in Corti toccu ghjugnu di u 2019, senza fà travagli impurtanti. U metudu ? Deve fà si sta riduzzione per via di un’uttimisazione di a gestione di l’istallazione tecniche (lumi, scalleria…) è di a sensibilisazione di i studienti è di i persunali à i gesti boni da aduprà. Ma al di là di st’iniziativa nant’à sti dui bastimenti, si tratta dinù d’allargà stu cantieru à ogni campus « per via di una surveglienza da pudè identificà  ciò chì ùn viaghja è per via di una una sensibilisazione più forte di a cumunità universitaria », preciseghja Pierre Mattei.

D’altronde, s’arrembanu st’iniziative à d’altre azzione messe in ballu da l’Università di Corsica in u quadru di u so dispusitivu « eco-campus ». Dapoi u 2017, hè stata generalizata a trascelta inde tutti i bastimenti è in i spazii esterni di i campus. À tempu, face dinù l’Università di Corsica a scumessa di l’ecunumia d’energia per via d’iniziative in quantu à a mubilità. Messu in ballu in u 2016, u pianu di spiazzamentu  è di mubilità universitaria vole ghjustu à puntu « creà un caminatu trà i campus è ver’di i campus, è favurizà i modi di spiazzamentu dolci », face sapè Gérard Peraldi, u direttore generale di i servizii di l’Università di Corsica.

Tandu, hè statu statu iniziatu un cumitatu d’avviamentu da fà participà a Merria di Corti, a Cullettività di Corsica, a Cumunità di e Cumune di u Centru Corsica è a Cascia di i Dipositi.

 

 

Di fatti, hè stata creata in u 2015 un’appiecazione di co-vitturaghju, cù a cuntribuzione di studienti, è hè stata fatta un’inchiesta nant’à a mubilità di a cumunità universitaria in u 2017.

Seranu tandu messi in ballu nant’à u campus di Corti azzione di sensibilisazione à i vantaghji di a bissicletta è parechji accunciamenti di u staziunamentu. Da favurizà a mubilità elettrica, seranu rimpiazzati i veiculi termichi di l’Università di Corsica per i trè anni à vene da vitture elettriche, è seranu stallati punti di carica da pudè alimentà li. D’altronde, sò digià state fatte certe istallazione nant’à i siti di Ricerca in Aiacciu è in Biguglia. « Si scrive inde una vuluntà pulitica forte di l’Università di favurizà e mubilità dolce è di fà calà l’impattu ambientale in leia cù i spiazzamenti, puru al di là di u campus », face sapè Gérard Peraldi.

Si vole scrive l’Università di Corsica inde un prucessu virtuosu inde u quale puderanu esse investite l’ecunumie fatte inde a rialisazione d’altri prugetti eco-rispunsevuli. « Ciò chì hè ecunumizatu puderà esse riinvestitu inde prugetti per megliurà e cundizione di travagliu di i studienti è di i persunali di l’Università di Corsica per favurizà u benestà, ciò chì serà d’altronde una di e prossime vie di sviluppu di a nostra pulitica d’eco-campus », prughjetta Gérard Peraldi.

Cuncorsu Cube 2020

Infurmazione nant'à u cuncorsu

READ MORE

Eco-campus

Azzioni cutidiani di l'Università di Corsica

READ MORE