Title Image

Dirittu di u numericu : una furmazione « guida » à l’Università di Corsica

Messu in ballu à l’Università di Corsica, un Master spezializatu inde u dirittu di u numericu prupone un’ozzione ghjuridica di l’inghjochi tecnichi, ecunomichi è suciali di a trasfurmazione numerica incù un versu pluridisciplinariu.

 

 

Inde un mondu scunvoltu da a digitalisazione, ghjè una furmazione propiu oghjinca chì hè stata messa in ballu da a Facultà di Dirittu è di Scenze Pulitiche di l’Università di Corsica. Iniziata di sittembre 2018 nant’à u campus di Corti, hè statu imaginatu un Master menzione « Dirittu di u numericu, Parcorsi, Servizii è terzu di cunfidenza » da pudè risponde à l’inghjochi ghjuridichi di a numerisazione di a nostra sucetà.

U so scopu : furmà i ghjuristi capaci à afferrà l’ambiente numericu di modu pluridisciplinariu.

« A nostra ambizione hè stata di porghje, per via di una furmazione innuvante, risposte à e dumande ch’ella pone à u dirittu a trasfurmazione numerica, spieca André Giudicelli, prufessore di dirittu privatu è di scenze criminale è rispunsevule pedagogicu di stu Master. Hè una prublematica chì ci impreme à tutti è chì abbisogna di creà arnesi specifichi per avè una riflessione nant’à st’evuluzione ».

Sò stati messi à u prugramma parechji insignamenti d’attualità : a prutezzione di i dati persunali, a cyber-securità, e tecnulugie dirruttive, l’archivii elettronichi, l’identità numerica, a cyber-criminalità… Hè abbastanza chjaru u cuncettu : si tratta di dà à i studienti e cunniscenze ghjuridiche è e cumpetenze chì li permettenu di accustà e difficultà cagiunate da e tecnulugie di l’infurmazione. Tandu, piglia a furmazione pruposta à l’Università di Corsica un versu propiu nuvatore. Hè liatu l’accostu ghjuridicu à l’amparera di e cunniscenze di l’inghjochi tecnichi, ecunomichi è suciali, mettendu in associu a teuria è a pratica per via di stazii inde l’intraprese o e cullettività.

« Inde tutti i duminii induv’ellu ci entre u dirittu, si pone a quistione di u numericu, cunsidereghja Eric Caprioli, avucatu à a corte di Parigi, spezializatu inde u dirittu di e nove tecnulugie di l’infurmazione è di a cumunicazione, chì face parte di l’intervenanti prufeziunali di u Master. Anu creatu bisogni novi tutte st’evuluzione, in particulare in quantu à i ghjuristi è à l’avucati delegati à a prutezzione di i dati. Per via di ste specificità, face da guida à u livellu francese a furmazione messa in ballu à l’Università di Corsica ».

U sughjettu, u cunnosce bè Eric Caprioli. Da membru di a delegazione francese à e Nazione Unite in quantu à u cummerciu elettronicu dapoi u 1993, issu duttore in dirittu, abilitatu à direge e ricerche, faci i corsi inde stu Master dapoi l’apertura di a furmazione. À sente u ghjuristu, sò tamanti è vanu criscendu i bisogni nati incù sta trasfurmazione numerica di a sucetà. In fatti, s’ellu avia 2500 delegati in u 2018 l’associu francese di i delegati à a prutezzione di i dati persunali, hà francatu avà i 5000 membri, chì sò tutti prufeziunali di a lege Infurmazione & Libertà è di u regulamentu generale nant’à a prutezzione di i dati. « Ogni ghjornu, face affaccà u numericu situazione nove è specifiche chì abbisognanu d’esse schjarite per via di u dirittu, face sapè Eric Caprioli. Serà per un dettu u casu di a spressione nant’à e rete suciale, chì s’hà pigliatu un’impurtanza di prima trinca sti pochi anni ».

Una dumanda chì cresce è chì face affaccà dinù i sbocchi prufeziunali per parechji ghjuristi chì anu fattu di sta materia una spezialità. Trà i cabinetti d’avucati spezializati, l’intraprese d’archivera, l’amministrazione di e cullettività lucale… sò parechje e vie di sviluppu, chì tocca oramai u numericu à ogni duminiu d’attività di a sucetà. N’hà propiu cuscenza Léa Coutray de Pradel. Uriginaria di l’Acchitania, ùn hè stata tantu à francà u mare issa giovana studiente di u Master  « Dirittu di u numericu, Parcorsi Servizii è terzu di cunfidenza » per seguità a so furmazione ghjuridica in Corsica è buscà si sta spezialisazione. « Hè una disciplina innuvante u dirittu di u numericu, chì ci tocca à scavà torna, stima Léa Coutray de Pradel, incù a so sperienza di delegata di sta prumuzione di Master. Ci permette issa furmazione inedita di studià propiu st’universu smaterializatu è d’acquistà e cunniscenze chì sò diventate indispensevule per u funziunamentu di u mondu di l’intraprese è di l’amministrazione ».

Hà digià principiatu à apprufundisce le isse cunniscenze l’Università di Corsica, mettendu in ballu i scambii scentifichi è una spertizia d’insignamentu in giru à sta materia. Da pudè creà un locu di riflessione per arricchisce e furmazione iniziale è schjarisce l’inghjochi chì si anu da prisentà per stu dumane, hè stata inaugurata di sittembre 2018 nant’à u campus di Corti una catedra in giru à u tema di a « cunfidenza numerica », sott’à a rispunsabilità di André Giudicelli è di Eric Caprioli.

 

Maghju 2020

Facultà di Dirittu è di Scenze Pulitiche di l’Università di Corsica

https://droit-sciencepo.universita.corsica/

READ MORE

Fiche diplôme

Master Dirittu di u Numericu

READ MORE