In u filu di u prugramma « Myrte » stabilitu nant’à u situ di l’Università di Corsica / CNRS, a piattaforma Paglia Orba* hè, dapoi u 2014, l’attrazzu di spiccu di l’Università di Corsica in quantu à a ricerca in u duminiu di e rete elettriche intelligente. Trà i so studii nant’à a pruvista è a pruduzzione d’energie, vole purtà suluzione innuvante à i bisogni di l’isula in energia elettrica.
Hè unu di i prughjetti maiò di trasferimentu di tecnulugia purtatu da l’Università di Corsica, u CNRS è u CEA. Stesa nant’à un situ di 11 ettari à u centru scentificu Georges Peri, à l’entrata d’Aiacciu è di l’Isule Sanguinarie, s’impegna a piattaforma PAGLIA ORBA in u duminiu di a ricerca energetica usendu di i raghji di sole cum’è risorza rinnuvevule. In u so laburatoriu, una vintina di cercadori si danu di rimenu da appruntà tecnulugie di pruduzzione è di pruvista da trasfurmà u sole di Corsica in energia.
In u filu di u prughjettu “MYRTE”, una centrale fottovoltaica inaugurata in u 2012 è chì permette di coglie l’energia di u sole da pudè la cunservà sott’à a forma d’idrogene è utilizà stu novu vettore energeticu per riinghjettà l’energie in casu di bisognu in a reta elettrica, cuntribuisce a piattaforma PAGLIA ORBA à « schjarisce » a Corsica. À tale puntu chì, oghje ghjornu, anu e squadre di PAGLIA ORBA 31 mattoni tecnulogichi innuvanti di pruduzzione è di pruvista. U so metudu : studià l’ibridazione di e sfarente forme di pruvista d’energia cù e sfarente forme di pruduzzione d’energie rinnuvevule da pudè assicurà di manera uttimizata a distribuzione d’elettricità verde.
“L’idea hè di mette in ballu una strategia per risponde à a prublematica energetica di l’isule chì, per a maiò parte, sò ZNI (Zone non-intercunnettate) è prisentanu rete più fragile cù costi di pruduzzione superiori à quelli di u cuntinente, spieca Christian Cristofari, rispunsevule scentificu di a piattaforma. Si tratta dunque di truvà, per via di a pruvista, un mezu di trapassà a limita di i 30 % d’energie rinnuvevule in e rete eletriche è di minimizà i costi di u kilowatt-ora pruduttu. Hè per ciò ch’ella hè girata a nostra strategia ver’di l’accoppiu trà l’energie rinnuvevule è a pruvista, in cuncertazione cù EDF, u CEA è AREVA SE ». In fatti, esistenu digià ste tecnulugie ma « st’accoppiu di putenza hè a prima volta à u livellu mundiale”, accerta l’universitariu.
Da valurizà st’azzione scentifiche per via di u trasferimentu di tecnulugie, una start-up, battizata “Stepsol” , hè ancu stata creata dui anni fà. Cuncentrata si nant’à u sviluppu di una suluzione di Stazione di Trasferimentu d’Energia cù Pumpamentu, per via di l’accoppiu di una centrale fottovoltaica cù un’appruvista idrolica per una pruduzzione ammaestrata, hè unu di i primi sbocchi cuncreti di a piattaforma PAGLIA ORBA. Un prugramma chì deve risponde à un inghjocu tamantu, soprattuttu in sti tempi chì e ZNI cunnoscenu evuluzione di cunsumazione di 3,8 % à l’annu contru à 1 % di regula in cuntinente. “Diventa tandu a Corsica un laburatoriu da pruvà una catena energetica scarbuniata, stima Christian Cristofari. Ci hè à l’ingrossu 10 000 isule in u mondu, raprisentendu circa 500 milioni d’abitanti. Face chì a prublematica energetica di l’isule hè una scumessa maiò” .
Di fatti, si tratta dinù di sparghje a tecnulugia”MYRTE” à u livellu di u territoriu corsu è di francà un passu oramai. In fatti, a Cullettività Territuriale di Corsica, in partenariatu cù l’Università di Corsica, u CEA è AREVA H2-Gen cerca à sviluppà “MYRTE” in Bastia è in Aiacciu da dispone di una catena energetica cumpletta scarbuniata. Hà da permette à tempu d’assicurà una pruduzzione elettrica per sustene a reta è di assicurà una pruduzzione d’idrogene per a mubilità ; sette stazione idrogene seranu spartute nant’à tuttu u territoriu corsu da quì à u 2023. Stu prughjettu, battizatu “Hy-Pa Corsica” , labellizatu da u Ministeriu di l’Ambiente, di l’Energia è di u Mare in u 2016 dopu à a chjama à prughjetti « Territoire Hydrogène », risponde propiu à a prugrammazione pluriannuale di l’energia (PPE) chì prevede un parcorsu verde d’autunumia energetica da quì à u 2050.
* Piattaforma Avanzata di Gestione eLettrica Isulana Assucendu a Pruvista è l’energie rinnuvevule – Obbiettivu Autunumia.
