Per via di u prugettu ARCHE, studieghjanu l’Università di Corsica è i so partinarii stu siscu trasmessu da e zecche à l’omi è à l’animali inde e regione meridiunale di a Francia. U scopu : capisce megliu l’emergenza di sta malatia chì puderia ancu tumbà l’omi.
S’interessanu i cercadori di l’Unità di i Sischi Emergenti (Ecchisi-Marseglia Università, Università di Corsica, IRD 190, Inserm 1207, IRBA) una malatia emergente cù un putenziale epidemicu forte, chì abbisogna di più vigilenza in Francia dapoi parechji anni : a frebba emurragica di Crimea-Congò. « U scopu di e ricerche fatte inde u quadru di u prugettu ARCHE hè di valutà u risicu di emergenza di stu siscu, in particulare in e regione di u sudu di a Francia, spieca Alessandra Falchi, maestra di cunferenze in epidemiulugia à l’Università di Corsica è direttrice aghjunta di l’Unità di i Sischi Emergenti. Si tratta, inde un primu tempu, di cullettà e cunniscenze è di capisce megliu i meccanisimi di diffusione di stu siscu. »
Trasmessa da e zecche à l’omi è à l’animali, era fin’à oghje usservatu in particulare in Africa, in Asia è inde certe regione d’Europa. Hè statu rimarcatu u siscu pocu fà inde u sudu di a Francia invece ch’ella prugressa l’aria di ripartizione di ste zecche ver’di u nordu di u paese cù l’effettu soprattuttu di u scambiamentu climaticu. S’ella hè assintomatica per l’animali è ùn prisenteria micca risichi nant’à a cunsumazione di carne, puderia quantunque tumbà l’omi sta malatia.
Per l’omi, principa l’infezzione cù i sintomi di l’influenza, è pò mutà cù forme emurragiche severe chì sò murtale in circa 30 % di i casi. S’ellu hè statu rimarcatu u siscu per a prima volta nant’à e zecche cullettate inde certi allevi buini di u sudu di u paese in u 2023, ùn hè statu custattatu nisunu casu umanu autoctonu oghje ghjornu. Ma, inde d’altri paesi, cum’è a Spagna, sò stati rapurtati una duzina di casi umani dapoi u 2016, incù un ritimu di unu o trè à l’annu, preciseghja l’Istitutu Pasteur. Si sò prudutti in magiurità sti casi ind’è e persone chì travaglianu in u settore di l’allevu, cum’è l’agricultori, l’impiegati di tumbatoghji o i veterinarii.
Per ste cagione, s’interessanu da vicinu i puteri publichi à sta malatia chì face parte di i sischi infezziosi emergenti zoonotichi. In u 2023, hà lanciatu u guvernu una prima chjama à prugetti di u prugramma di ricerca « France 2030. » Chjamatu « PREZODE », per PREventing ZOonotic Diseases Emergence, hà per scopu di sustene i prugetti interdisciplinarii di a ricerca fundamentale per capisce megliu e leie trà l’attività antropiche, i scambiamenti glubali è i meccanisimi d’emergenza di e malatie zoonotiche. Per ghjunghje ci, hà assuciatu u prugettu ARCHE ondeci partinarii, è si hè buscatu un aiutu di trè milioni d’eurò per mette in ballu stu prugramma di ricerca.
Averianu da permette i risultati aspettati di identificà i fattori chì favurizeghjanu à tempu l’emergenza è i risichi di trasmissione, di megliurà i metudi di detezzione di u siscu, di valutà a so circulazione è di mudellizà a dinamica di a so trasmissione. « À longu andà, si tratterà di prupone azzione preventive è misure di prutezzione di a pupulazione, avanza Alessandra Falchi. Venerà dopu, forse, a quistione di u trattamentu di sta malatia è di un vaghjolu. Chì risicheghja di raprisentà st’emergenza, per l’avvene, un’imbusca assai forte per a salute publica. »
