Anu messu in risaltu i travagli di ricerca fatti à l’Università di Corsica una sinergia antibiotica attiva nant’à i batterii multiresistanti è impegnati inde patulugie di a pelle per a salute umana è veterinaria. Hà cagiunatu sta scuperta un dipositu di brivettu n° EP24171994.7 u 23 d’aprile di u 2024. Dapoi parechji mesi è sottu à u cummandu di a SATT Sud-Est, sò aperte discussione trà l’Università di Corsica, u CNRS è parechji industriali di livellu internaziunale inde u settore farmaceuticu di a salute animale. U scopu di sti scambii : sviluppà st’antibioticu per un usu veterinariu da pudè trattà e malatie infezziose d’origine batteriana.
Hè un’avanzata significativa in u duminiu di a ricerca à l’Università di Corsica. Dapoi parechji anni, sò impegnati i scentifichi di u laburatoriu Scienze per l’ambiente (Università di Corsica Pasquale-Paoli – CNRS) per mette in risaltu un prucedimentu antibatterianu innuvante, esciutu da u mischju di duie mulecule, chì hè sbuccatu nant’à u dipositu di brivettu in u 2024. U so scopu : « sviluppà un antibioticu attivu nant’à patulugie di a pelle chì ponenu i prublemi in quantu à a salute umana è veterinaria, cum’è e piaghe o l’inghjerghje », spieca Elisa Hardy, duttore è ingeniere di ricerca inde u laburatoriu.
Sò sbuccati sti travagli fatti in u quadru di a so tesa di dutturatu inde l’acchisu Ambiente è Salute di u prugettu Risorze Naturale di u laburatoriu Scenze per l’Ambiente, sustenuta d’aprile di u 2025 sott’à a direzzione di u Prufessore Liliane Berti è di u Duttore Elodie Guinoiseau, nant’à a messa in evidenza di una sinergia antibiotica attiva nant’à batterii multiresistanti.
Hà permessu st’innuvazione, almanaccata à capu di trè anni di ricerche in cullaburazione stretta cù u Prufessore Ange Bighelli è u Duttore Mathieu Paoli, di dipusità d’aprile di u 2024 una dumanda di brivettu europeu cù u cuncorsu di a SATT Sud-Est. Hà per missione di valurizà l’invenzione esciuta da i laburatorii publichi per via di un accumpagnamentu à u livellu ghjuridicu, ecunomicu è tecnulogicu, per trasferisce st’innuvazione ver’di u mondu industriale per via di licenze di spluttazione. Hè stata iniziata dopu una dumanda di stensione à l’internaziunale à u veranu 2025.
Riguarda sta scuperta scentifica l’elaburazione di un mischju antibioticu di duie mulecule chì anu un’attività cumplementaria : una hè batteriostatica, è cuntribueghja à fà piantà a criscenza batteriana ; l’altra hè batteriucidia, vale à dì ch’elle permettenu e so pruprietà di tumbà i batterii.
« Hè liata di modu direttu l’attività antibiotica di stu mischju à a struttura chimica di e molecule chì a cumponenu », sviluppeghja Elisa Hardy. Hè attiva sta sinergia antibiotica nant’à parechji batterii, frà i quali u stafilococcu induratu chì resiste à a meticillina (SARM). Hè dinù attivu stu prucedimentu nant’à d’altri generi di stafilococchi chì resistenu à certi antibiotichi usuali è à d’altri batterii patogeni à l’origine d’infezzione umane o animale cum’è i Listeria, Enterococcus o i Streptococcus.
« U studiu di a rilazione trà a struttura chimica di e molecule è l’attività antibatterianu hà permessu di mette in risaltu un meccanisimu antibatterianu innuvante, chì hè sempre studiatu oghje ghjornu, preciseghja Elisa Hardy. Si tratta oramai, per francà una nova tappa di stu prugettu scentificu, di fà un quaternu di e cariche inde u quadru di un partinariatu, in corsu d’elaburazione, cù un industriale. »
Cuntattu: Elisa HARDY, Docteure et Ingénieure de Recherche au Laboratoire SPE de l’Università di Corsica : hardy_e@univ-corse.fr – 06.01.59.38.49
Ottobre di u 2025
