A per via di un diploma innuvante chì piglia a forma d’una residenza d’artista, vole cuntribuisce a sezzione audiovisiva di l’Università di Corsica à u dinamisimu di a filiera sinematografica isulana.
Université de Corse
Université de Corse
Face parte di i puntelli di a filiera audiovisiva di l’Università di Corsica Pasquale-Paoli. U so nome : Creatacc, per « creazione è tecniche audiovisive è sinematografiche di Corsica. » Messu in ballu in u 2008, hè statu imaginatu stu diploma sustenutu da a Cullettività di Corsica da riempie una missione precisa : cuntribuisce à u dinamisimu di a filiera sinematografica isulana. Si scrive propiu inde sta logica u D.U. Creatacc, chì cerca à furmà generazione nove di sineasti è di tecnichi da accumpagnà u sviluppu di u sinemà isulanu. Pruposta à fiancu à a licenza prufeziunale Tecniche di u sonu è di l’imaghjina, hè avviata sta furmazione innuvante ver’di a scrittura, a rialisazione è a pruduzzione. « Hè statu cuncipitu stu diploma per risponde à i bisogni specifichi di u territoriu isulanu. S’arremba sta furmazione à a messa in pratica di l’insignamenti per sbuccà nant’à a fabricazione di filmi prufeziunali », spieca Colomba Sansonetti, insignante in sinemà è rispunsevule pedagogica di stu D.U. Per buscà si stu diploma particulare di un annu, rializeghjanu o pruducenu un filmettu di ducumentariu o di fizzione durante u so cursus.
Université de Corse
Da mette in ballu stu prugettu inde e cundizione bone, anu fattu a scumessa i rispunsevuli di u D.U. di fà una furmazione ristrinta : ogni annu, sò limitati l’effettivi à una duzina di scritti – studienti in audiuvisivu di livellu Bascigliè + 3 o basciglieri chì anu trè anni di sperienza prufeziunale. Piglia tandu stu cursus a forma d’una residenza d’artisti da ch’ella sia facilitata a creazione di i studienti cù un metudu persunalizatu è adattatu à i bisogni d’ognunu. Durante a furmazione, sò scumpartuti i corsi trà e duie ozzione scrittura-rialisazione o scrittura-pruduzzione, fatti cù i prufeziunali è inquadrati per via di un tutoratu da acquistà megliu e cumpetenze. Durante un annu, anu u so chì fà i studienti cù u muntame di u so scenariu, a priparazione di u so turnagiu è a rialisazione di u so filmu.
Da permette a so rialisazione è u so finanziamentu, l’hà pigliata cù e bone a filiera audiovisiva di l’Università di Corsica : hà messu in ballu un partinariatu cù u Gruppu di ricerca è d’assaghji sinematografichi (Grec), da ch’elli pudessinu francà u passu i so studienti è impegnà si inde una prima pruduzzione. Dapoi una cinquantina d’anni pruduce assai filmi corti st’associu cù u sustegnu di u Centru naziunale di u sinemà (CNC) è ghjè ancu diventatu un puntile da lancià a carriera di i sineasti chì principianu. Hè, per un dettu, per via di u Grec ch’ella hà pruduttu a realisatrice corsa Caroline Poggi, scritta tandu inde sta furmazione nant’à u campus di Corti, Tant qu’il nous reste des fusils à pompe, u filmettu chì si era buscatu un Orsu d’oru à u festivale internaziunale di u filmu di Berlin, in u 2014.
Dapoi a creazione di stu diploma, sò pussuti tandu furmà si 150 studienti è sviluppà u so versu creativu inde u quadru di stu D.U. chì hà digià arricchitu a pruduzzione sinematografica isulana cù una sessantina di filmi è di ducumentarii. S’ella li permette a rinomina di sta furmazione di attrae studienti internaziunali è di u cuntinente, ùn pianta mancu appena di infonde inde a sucetà isulana. Nant’à i 300 tecnichi è cumedianti scritti à u Polu Turnagii di Corsica, venenu guasi a metà da a filiera sinemà/audiovisivu di l’Università Pasquale-Paoli. « L’idea di sta furmazione hè di dà à i studienti a pussibilità di pruvà si la inde u duminiu di u sinemà è di accumpagnà li per francà u passu di a rialisazione. Ma hè dinù di furmà, in Corsica, e risorze necessarie per una strutturazione vera di a filiera è dà li u so abbriu », face sapè Colomba Santonetti.
Université de Corse
