Dapoi u 2012, cunsacreghja l’Università di Corsica un duminiu di ricerca, certificatu da u CNRS, à a gestione di l’acqua cuntinentale in u Mediterraniu. U scopu : capisce megliu u ciculu di l’acqua da pudè risparmià megliu a risorza cù l’arnesi adattati.
Face parte di e tematiche chì voltanu à spessu in u dibattitu publicu in Corsica : cumu si puderà gestisce megliu l’acqua inde un’isula carca à risorze ma sempre tesa in quantu à e so pruviste ? Da circà à risponde ci, dapoi u 2012 cunsacreghja l’Università di Corsica un duminiu di ricerca à a gestione di l’acqua cuntinentale in u Mediterraniu. Sott’à a direzzione di l’Università di Corsica è di u CNRS (UMR SPE 6134), per via di u laburatoriu Scenze per l’Ambiente, s’interessa una squadra di cercadori in idrogeulugia à u ciculu di l’acqua isulana è à l’influenze di u clima nant’à a so evuluzione. U scopu : « si tratta di capisce megliu u funziunamentu di l’acqua superficiale è sutterrania per creà l’arnesi scentifichi di caratterisazione è di seguitu da pudè gestisce megliu a risorza, spieca Frédéric Huneau, prufessore d’idrogeulugia inde u prugettu strutturante « Gestione è valurisazione di l’Acqua in u Mediterraniu » di l’Università di Corsica è di u CNRS. Per gestisce una pruvista d’acqua, ci vole à esse capace di dì induv’ella si trova, d’induve vene, chì sò e caratteristiche di soiu, è di ricustituisce u so caminatu sutterraniu per capisce cumu si rinnova a risorza ».
In u quadru di i so travagli, hà messu in ballu u cercadore un metudu d’investigazione geochimiche è isottopica da pudè stimà « l’età di l’acqua » cù l’arnesi cum’è u carbonu-14 o gazi freoni capaci à misurà u rinnovu di e pruviste è à fà ipotesi nant’à l’origine è u parcorsu di l’acqua inde l’acquiferri – e pruviste d’acqua sutterrania sfruttate per l’acqua beitoghja o l’annacquera. « Ci permettenu st’analisi isottopichi di capisce quandu si rinnova a risorza, di precisà a so evuluzione in quantità o di sapè s’ella hè influenzata a so qualità da l’attività umane chì a puderianu sfruttà troppu o inquinnà, preciseghja Frédéric Huneau. À tempu, ci anu impostu l’evuluzione climatiche chì si vedenu in Corsica sti pochi anni di valutà u so impattu à mezu andà nant’à a qualità è a quantità di l’acqua ».
Per u so travagliu, studieghjanu in particulare i scentifichi i pughjali di a laguna di Biguglia, vicinu à Bastia, 
da circà à misurà l’effetti di l’urbanisazione liturale nant’à e risorze in acqua, per via di u risanamentu chì face affaccà pulluzione nove. In u frattempu, s’interessanu dinù i cercadori à u pianottulu di calcare di Bunifaziu, un situ turistichi assai chì accoglie circa 2 milioni di visitori ogni annu, da circà à stimà u putenziale acquiferru di e zone sottumesse à una pressione antropica forte. Cù una quarantina di surghjente cense nant’à u territoriu, face parte a Corsica di e regione di Francia chì anu u più ghjacimenti d’acqua sutterrania termo-minerale, frà i quali quelli di a Piaghja urientale è di a Castagniccia induv’elli sò impegnati assai i cercadori di l’Università di Corsica / CNRS.
Intantu, s’elli riguardanu soprattuttu e risorze di l’isula, ùn sò limitati sti travagli à e fruntiere di a Corsica. Dapoi parechji anni, sò impegnati i scentifichi di u laburatoriu Scenze per l’Ambiente per studià e risorze d’acqua sutterrania di e regione liturale di Djibouti, in Africa, da valutà à longu andà l’evuluzione di a qualità di l’acqua sutterrania cù un clima seccu è cù una sfruttera sprupusitata.
A finalità di sti studii ? Creà arnesi d’aiuti à a decisione, traspunevuli da un situ à l’altru, per anticipà l’evuluzione di a risorza fendu e pruspettive. Bisognu à ramintà ch’ella hè tamanta l’imbusca per a Corsica. Di sicuru, per via di a geugrafia di soiu, si busca l’isula assai risorze in acqua per via di u so putenziale idricu, u più impurtante di u Mediterraniu. Ma ùn hè uguale a so scumpartera longu à u territoriu è di pettu à a friquentazione di l’estate. Basta à aghjustà ci a sicchia per creà una situazione di tensione.
Di fatti, s’interessa dinù u gruppu di travagliu di l’Università di Corsica / CNRS à u funziunamentu di l’acqua sutterrania da creà una risorza di sustituzione per l’acqua di surfazia sfruttata assai oghje in Corsica. Ne dicenu abbastanza i sciffri di i scentifichi : invece chì à u livellu naziunale vene 80 % di l’acqua cunsumata da risorze sutterrane è 20 % di surfazia, in Corsica sò ste prupurzione di 60 % è 40 %. « Di manera generale, facenu vede i studii ch’ella hè menu sposta l’acqua sutterrania à a pulluzione chè quella di surfazia, face sapè Frédéric Huneau. Hè più bona a so qualità. Tandu, averà a Corsica interessu assai à dà si i mezi di sfruttà di più stu putenziale da assicurà si risorze nove per l’avvene ».
